Vilagarcía reformará a praza de abastos de Vilaxoán
Por Redacción
O goberno municipal de Vilagarcía adxudicou a redacción do proxecto básico e de execución da reforma interior da praza de abastos de Vilaxoán. O obxectivo da actuación é acondicionar e optimizar o espazo para unha maior funcionalidade aos actuais concesionarios, para que as melloras inviten a atraer nova actividade.
Segundo informa a concellería de Promoción Económica que dirixe Alba Briones, na actualidade só están activos tres postos, cando a mediados dos anos 80 operaban unha ducia de vendedores de peixe, carne, conxelados, froita e verdura.
A firma Promove, Xestión Técnica S.L.P. será a encargada de redactar o proxecto de reforma interior da praza de abastos coa finalidade de convertela nun centro de atracción de comerciantes e consumidores.
A actuación afectará aos 274 metros cadrados de superficie coa que conta o edificio e incluirá o deseño de novos postos, a redistribución dos existentes e a introdución doutras melloras tendentes a optimizar a actividade, aplicando criterios de sustentabilidade.
A compañía dispón de tres meses de prazo para entregar o traballo.