Comezan as obras do segundo tramo do tren de acceso ao porto de Vilagarcía
Por Redacción
As obras do ferrocarril de acceso aos peiraos Comercial e de Comboa do porto de Vilagarcía de Arousa retomaranse este luns 29 de outubro. Farano co segundo tramo desta infraestrutura, que se prevé que estea lista no primeiro trimetre de 2013.
O inicio das obras notarase co peche ao tráfico dun dos carriis da rúa Rivero de Aguilar, no tramo comprendido entre a rotonda de acceso ao peirao de Pasaxeiros e a zona do Cavadelo.
A titularidade do viario é da Autoridade Portuaria de Vilagarcía, pero de uso público (permite a conexión directa entre a rúa Vale-Inclán e a zona do Ramal), de modo que o corte parcial ao tráfico desta vía coordinouse coa administración local, a fin de minimizar os inconvenientes para os condutores.
As previsións da Autoridade Portuaria son que o corte parcial ao tráfico deste viario mantéñase ata primeiros de decembro, sempre que as condicións meteorolóxicas faciliten a boa marcha das obras. Deste xeito, avánzase na execución duns traballos que teñen a súa finalización prevista no segundo trimestre do ano próximo.
As previsións da Autoridade Portuaria son que o corte parcial ao tráfico deste viario mantéñase ata primeiros de decembro
Segundo informou a Autoridade Portuaria, o peche ao tráfico afectará ao carril en sentido O Ramal, mentres que os vehículos que se dirixan a Vilaxoán poderán circular pola zona con normalidade.
O corte está restrinxido ao tramo de viario portuario situado entre os parques do Cavadelo e O Centenario, polo que os condutores que circulen cara a Carril deberán tomar a avenida da Marina ata chegar á Alameda.
Con motivo das obras quedará inutilizada a entrada ao parque do Centenario desde a rúa Rivero de Aguilar, co que o acceso deberá realizarse desde o peirao de pasaxeiros.