Marisco e bacallao á galega, menú especial nos hospitais para Noiteboa e Fin de Ano
Por Oskar Viéitez
Os servizos de hostalería dos hospitais Montecelo e Provincial de Pontevedra, así como o do Hospital do Salnés en Vilagarcía de Arousa, ultiman nestas datas os preparativos para a celebración das festas do Nadal, nas que servirán diversos menús especiais para o persoal de garda e para que aquelas persoas que teñan que pasar esta época ingresadas.
Para a cea de Noiteboa o menú para pacientes será de salpicón de marisco, sopa de galiña, bacallau á galega con coliflor e escalopines ao oporto con champiñóns
A comida do día de Nadal ten un menú composto por pastel de atún, crema de cabaza con gambas salteadas, tenreira asada con salteado de verduras, pescada á mariñeira con pure de pataca e torta de queixo.
O menú da cea de Fin de Ano arrinca cun pastel de marisco seguido de crema de champiñóns con picatostes, bacallau á galega con coliflor e pavo recheo con guarnición. De sobremesa haberá "delicias do Nadal" e non faltarán as uvas da sorte.
A carta do 1 de xaneiro de 2021 trae piquillo recheo, crema de cabaciña con gambas salteadas, pito á laranxa con guarnición e pescada en salsa con salteado de verduras.
E finalmente, a última das comidas especiais nestas datas do Nadal é a do Día de Reis, o 6 de xaneiro, e terá un menú con salpicón de marisco, pastel de atún, pito en crema de champiñóns, pescada á vasca e, como non, rosca de Reis.
As cociñas dos hospitais Montecelo, Provincial e do Salnés son habitualmente un punto de gran actividade, nas que equipos compostos por pinches, gobernantas, cociñeiros, administrativos e técnicos en dietética e nutrición traballan para converter a alimentación nun factor engadido para a recuperación dos pacientes ingresados.
A preparación dos almorzos nos centros hospitalarios públicos desta área sanitaria durante estas datas conleva moita organización previa, posto que dunha quenda para outra, pinches e cociñeiros adiantan todo o posible para que, chegadas as festas do Nadal, poidan elaborar cada prato con todo o agarimo.