Inician as obras de mellora do abastecemento de auga en Sanxenxo
Por Redacción
O Ministerio de Medio Ambiente iniciou as obras de mellora do abastecemento en Sanxenxo dentro das actuacións previstas en toda a Ría de Pontevedra e cuxo investimento total ascende a 39,9 millóns de euros.
Estes traballos consisten na construción de dous depósitos en Dorrón e Buezas, que permitirán segundo o Ministerio almacenar un volume equivalente ao consumo do municipio durante 24 horas, o que proporcionará maior marxe de actuación ante posibles avarías e "conseguirá satisfacer as demandas de caudal nos momentos de máximo consumo, garantindo a presión na rede, e permitindo que a auga chegue a todos os puntos de demanda".
Ademais da actuación en Sanxenxo Medio Ambiente, a través da sociedade estatal Aguas de las Cuencas de España (Acuaes), antiga Acuanorte, iniciou en abril obras en Poio e Pontevendra, como a renovación das arterias de abastecemento a Poio e a Sanxenxo, situadas baixo a estrada PO-308, ou a mellora da estación de bombeo de Monte Porreiro.
As obras, financiadas nun 85% polo Ministerio con axuda de fondos europeos e nun 15% polos propios concellos, buscan "mellorar a cantidade e calidade do abastecemento, cun importante aforro enerxético, evitando o risco de desabastecemento polas puntas de demanda debidas ao incremento de poboación dos núcleos turísticos".