Todo a punto en Vilagarcía para que ninguén quede seco: chega a Festa da Auga
Por Redacción
Vilagarcía acolle esta fin de semana dous dos eventos máis multitudinarios das festas patronais de San Roque: a Festa da Auga que terá lugar o venres, e o Combate naval, que se celebra o sábado. O primeiro deles comezará, como ven sendo habitual, ás 11.45 horas co tradicional traslado de San Roque desde a igrexa parroquial da Praza de España á capela de San Roque. Quince minutos despois, contra as 12.00 horas, logo do pregón, nunha grúa e caldeiro en man, comeza a multitudinaria Festa da Auga.
Para garantir a seguridade e atender emerxencias na Festa da Auga, o servizo municipal de Emerxencias e Protección Civil de Vilagarcía porá en marcha un operativo especial no que participarán un total de 35 persoas entre membros do servizo e voluntarios da agrupación. Así, ademais das ambulancias para atender casos graves, infiltrarase na festa a oito socorristas con botiquíns portátiles para atender as pequenas incidencias sanitarias que se poidan producir.
A fase do operativo destinado a organizar a infraestrutura e o desenvolvemento da Festa da Auga será a primeira en poñerse en marcha. Será desde a tarde do día 15 cando comecen os traballos de instalación das plataformas que servirán como lanzadeiras da auga. Colocaranse dúas bases fixas, unha na intersección da Rúa Rey Daviña coa Baldosa, e outra na Rúa Cobián, enfocada cara a Praza de Galicia.
Estas lanzadeiras abasteceranse dos hidrantes situados nas rúas, mentres que outros dous puntos de lanzamento de auga instalaranse en Conde Vallellano e un terceiro na propia Praza de Galicia. Estes tres últimos consistirán en tres camións de extinción de incendios que utilizarán as súas mangueiras para regar aos participantes na Festa da Auga dentro da zona húmida.
O operativo de seguridade e emerxencias comezará á medianoite do día 15. O Servizo Municipal de Emerxencias e Protección Civil manterá de garda durante toda a noite as súas dúas ambulancias completamente equipadas que se mobilizarán dende á base tan pronto sexan solicitadas. Tamén se reforza o persoal de garda no servizo municipal.
O dispositivo nocturno de seguridade verase reforzado con persoal da Policía Nacional que desprazará a Vilagarcía axentes doutras comisarías da provincia, e tamén da Policía Local. O dispositivo elaborado dende o Concello foi coordinado cos Corpos de Seguridade do estado e local nunha xuntanza celebrada a semana pasada.
OLLO CO TRAFICO E OS APARCAMENTOS
Dada a multitudinaria afluencia de xente que soe acudir a estes eventos procedentes da periferia e outros municipios, prevese o incremento do tráfico rodado. Para tratar de reducir o máximo posible as incidencias circulatorias, o Concello recomenda que se evite utilizar o coche polo centro da cidade dende unhas horas antes do inicio das celebracións e ata que se dean por rematadas. Tamén se aconsella facer uso dos aparcamentos disuasorios dispoñibles.
Tendo en conta a experiencia doutros anos, a intensidade do tráfico comezará a incrementarse a partir da tarde noite do xoves 15 de agosto, con motivo da chegada das persoas que virán a participar na noite previa á Festa da Auga. Prégase que, na medida do posible se evite circular polo centro urbano, tamén por motivos de seguridade dos peóns.
Esta recomendación faise imprescindible dende ás 11:30 horas e as 17:00 horas do día 16 de agosto, dado que o tráfico pecharase totalmente nas rúas do centro incluídas na Zona Húmida para a celebración da festa da Auga e para a limpeza das mesmas unha vez rematado o evento. En canto ao sábado pola noite, tamén se prega que se evite acceder ao centro urbano dende as 22:00 horas que é cando o público comeza a trasladarse á zona das praias e o paseo marítimo para ver o Combate Naval.
O Concello lembra que existen grandes bolsas de aparcamento gratuíto situados a moi curta distancia do centro urbano aos que os condutores poder recorrer. Os máis amplos son o da Finca de Louro e os de Fexdega. Outras zonas para aparcar son a nova urbanización situada entre a Avenida de Cambados e As Pistas, Desamparados, a estación de Renfe e a rúa Ramón Piñeiro (onde o asilo), así como na Avenida do Porto, a Praza de Abastos e O Ramal.