Aberto o prazo para solicitar o Fondo Solidario de Libros de Texto e as axudas para libros e material escolar
Por Redacción
As familias interesadas en solicitar a súa participación no Fondo Solidario de Libros de Texto ou en pedir as axudas para a adquisición de libros de texto e vales para material escolar do alumnado de Educación Primaria, ESO e Educación Especial para o vindeiro curso escolar xa poden facelo a partir de mañá mércores.
O prazo para presentar as solicitudes permanecerá aberto dende o 20 de maio ata o próximo día 19 de xuño, tal e como establece a convocatoria que pode consultarse no Diario Oficial de Galicia deste martes.
Con fin de reforzar o apoio ás familias ante a situación de crise xerada pola pandemia COVID-19 e a atención aos máis desfavorecidos, para o vindeiro curso 2020-21 a Consellería de Educación aumenta as contías das axudas para a compra de libros (preto de 19,7 millóns de euros, o que supón un incremento de case o 63% con respecto aos 12,1 do presente curso); e flexibiliza os límites de renda para acceder aos vales de libros, material escolar e ao Fondo Solidario de libros, cunha maior cobertura en canto ao alumnado beneficiario. O reparto de orzamento faise a razón de 7.750.000 euros para o Fondo Solidario de libros de texto, 6.430.000 euros para as axudas a compra de libros e os 5.500.000 euros restantes para vales de material escolar.
As solicitudes poderán presentarse por vía electrónica (preferentemente) empregando a aplicación informática 'fondolibros' (https://www.edu.xunta.es/fondolibros), a través da sede electrónica da Xunta de Galicia, ou ben presencialmente nos propios centros docentes, así como en calquera dos lugares e rexistros establecidos na normativa reguladora do procedemento administrativo.
As axudas da consellería para a compra de libros están dirixidas ao alumnado matriculado en primeiro e segundo de Educación Primaria, e ao alumnado matriculado en Educación Especial e ao alumnado cunha discapacidade igual ou superior ao 65%.
O vindeiro curso modifícanse os tramos de renda per cápita familiar para dar cabida a un maior número de familias, e as contías aumentan entre 40 e 50 euros segundo o tramo de renda.
No Fondo solidario de libros pode participar o alumnado matriculado entre terceiro e sexto de primaria, e entre primeiro e cuarto de ESO. A asignación de libros de texto farase, ao igual que cursos anteriores, por orde inversa á renda per cápita da unidade familiar. En calquera caso, terá preferencia o alumnado en situación de garda ou tutela da Xunta ou cunha discapacidade igual ou superior ao 65%, con independencia da súa renda familiar. Neste caso tamén se flexibilizan á alza os treitos de renda per cápita.
O destinatario das axudas para material escolar é todo o alumnado matriculado en educación primaria e en ESO cunha renda per cápita familiar igual ou inferior a 6.000 euros (ata o de agora o límite era de 5.400 euros), e a contía da axuda mantense a mesma, isto é, 50 euros/alumno.