Arrestado un marinense nunha operación antidroga internacional
Por Oskar Viéitez
Un veciño de Marín figura entre os 36 detidos nunha rede que introducía haxix en España dende Marrocos para a súa posterior distribución a nivel nacional e internacional. Trátase de Antonio M.E. e foi detido o pasado 25 de xullo no seu domicilio de Marín.
Segundo fontes do Ministerio do Interior, os axentes da Garda Civil interviñeron na súa vivenda haxix, cocaína, balanzas e material para cortar a droga. A detención produciuse no marco dunha operación internacional que contou con colaboración de Europol, Eurojust e os corpos policiais de Marrocos e Francia.
A operación iniciouse hai xa meses, cando a Garda Civil de Cádiz interceptou un alixo de haxix enviado a Pontevedra dende Fuengirola.
Non obstante aquel non era o único comiso xa que o pasado 27 de marzo, e o 10 de abril se incautou doutro envío de polen de haxix de 30 quilos e se detivo dous marroquís. Pouco despois se interceptaba un terceiro alixo procedente de Madrid de 30 quilos. Pero de novo, en colaboración coas autoridades de Portugal tamén se frustrou outra entrega en Pontevedra.
O suposto líder da rede alcumado "El Pellejo" foi asasinado
No marco da Operación Inverno interviñéronse máis de 1.500 quilos de haxix, 100 gramos de cocaína, unha pistola, trece turismos, unha embarcación, unha motocicleta, máis de 32.000 euros en efectivo, máis de douscentos teléfonos móbiles, balanzas e outros efectos para a adulteración e venda en dose.
Segundo fontes da investigación o suposto líder da rede alcumado "El Pellejo" foi asasinado o 17 de xullo nun aparente axuste de contas entre bandas en Ceuta. Tratábase dun antigo sicario dun narco de San Lúcar alcumado o Rei das pateiras.
Durante a operación leváronse a cabo rexistros e detencións en Marrocos, Francia e Portugal, así como en Cádiz, Málaga, Xaén, Madrid, Pontevedra, Biscaia, Navarra, Barcelona e Ceuta.