A Xunta insta o Concello de Poio a que corrixa os "malos olores e gases" de Campelo
Por Redacción
A delegación territorial da Xunta en Pontevedra ven de trasladar ao Concello de Poio o malestar dun grupo de veciños de Campelo ante os malos cheiros da rede pública de saneamento deste municipio.
A acción da Xunta chega despois de que un grupo de veciños da parroquia de Campelo mantiveron este xoves unha reunión co xefe territorial de Medio Ambiente, Territorio e Infraestruturas en Pontevedra, José Luis Díez, co obxectivo de solicitar a colaboración da administración autonómica para por fin aos problemas de malos olores que aseguran proceden da rede pública de saneamento.
José Luis Díez explicou aos veciños que a situación ten que resolvela o concello, xa que se trata dunha responsabilidade estritamente municipal. "Deberá ser o Concello quen comprobe de onde proceden eses
malos cheiros e incluso os gases que, segundo estas persoas, se emiten dende a rede de saneamento", asegurou o xefe territorial.Os veciños insistiron en que levan xa tempo demandado unha solución para esta problemática, engadindo que son coñecedores de que é un tema municipal, polo que xa trasladaron tamén a situación ao alcalde da localidade, Luciano Sobral. Ante o xefe territorial matizaron que, polo momento, aínda non se fixo nada para buscar a causa do problema, que podería estar nos bombeos ou no redimensionamento da rede de saneamento.
Ante esta situación, e dado que a administración autonómica non pode actuar sobre servizos municipais sen permiso do concello, José Luis Díez púxose en contacto co alcalde para darlle traslado do demandado polos veciños e insistirlle na preocupación dos mesmos polos fortes cheiros e gases que están a notar na rúa Beiramar.
"Tamén lle solicitamos que se realicen canto antes os controis necesarios para garantir o benestar dos habitantes desta parroquia de Poio", rematou José Luis Díez.