Manuel Jabois, Bea Gómez e o Club Treboada "Amigos de Pontevedra 2013"
Por Redacción
Amigos de Pontevedra designou as persoas e entidades que recibirán a homenaxe este ano, que como é habitual se celebrará a véspera da Peregrina.
Esta xuntanza vén sendo tradicional, dende hai corenta e dous anos, nas xornadas festivas do verán, premiando aquelas persoas e entidades que dalgunha forma, por prestixio ou traballo, contribuíron ao engrandecemento da nosa cidade.
"Con esta iniciativa pretendemos enxalzar e recoñecer o labor realizado por estas persoas e entidades a través de diferentes disciplinas como a educativa, deportiva, institucional ou social", sinalou o presidente de Amigos de Pontevedra, Fernández Sieira.
Así ao longo destes anos teñen sido galardoados médicos ilustres, profesionais competentes, deportistas, traballadores, novas promesas, industriais, emigrantes e persoas sinxelas que se destacaron polo seu amor á cidade.
No tradicional "xantar" do próximo día 10 de agosto realizarase a entrega destas distincións, que nesta XLII edición serán para: Maria Luisa Rodriguez Novás, ex-bibliotecaria da Universidade Autónoma de Madrid; Bea Gómez Cortés, nadadora; Javier Nuño Vázquez Garza, Médico do MD Anderson Cancer Center de Madrid; Emilio Sacarrera Ruza, empresario; Manuel Jabois Sueiro, xornalista; Manuel e José Alberto Moreira Carrascal Grandín, empresarios e o Club Treboada, de ximnasia rítmica.