Condenados dous homes por agredir policías locais nunha pelexa nun bar
Por Oskar Viéitez
O voceiro do goberno local de Pontevedra, Raimundo González, deu conta este luns da sentenza do Xulgado do Penal número 3 de Pontevedra, pola que se condena dous homes por agredir dous axentes da Policía Local.
Trátase de Ricardo Tilve Reboredo e Daniel Maquieira Ontanilla reaccionaron fronte a unha intervención que axentes de municipais realizaban, en relación cunha pelexa, en principio allea a eles, iniciada nun bar da rúa Isabel II.
Foi unha reprimenda na rúa iniciada ás 2.20 horas do 11 de decembro do ano 2011 e que derivou en agresións a dous axentes da Policía Local, uns dos cales precisou de hospitalización.
No xuízo as partes alcanzaron un acordo por conformidade polo que os acusados recoñeceron ser autores dun delito de atentado contra axentes da autoridade e outro de lesións, polo que se condena a Ricardo Tilve a un ano e seis meses de prisión e que indemnice os dous axentes agredidos con 9.200 e 900 euros.
Igualmente a Daniel Maquieira resulta condenado a un ano de prisión e unha indemnización de 300 euros para un dos axentes.