Adeus ao mítico 'Chiringuito': a bocatería de Benito Corbal pecha tras 40 anos de actividade
Por Redacción
A oferta hostaleira da cidade perde un dos seus establecementos máis coñecidos. A bocatería 'El Chiringuito', pola que pasaron varias xeracións de pontevedreses, pechará ao público o próximo 30 de decembro.
Así o anunciaron os seus responsables a través dun cartel colocado na porta de entrada. O motivo do seu adeus: a xubilación da súa propietaria.
Tras máis de corenta anos de actividade, 'El Chiringuito' despídese agradecendo a "confianza" e a "fidelidade" demostrada pola súa clientela durante toda a súa traxectoria.
A bocatería, un dos dous únicos locais de hostalería que quedan na milla de ouro pontevedresa, foi durante todo este tempo un lugar de paso obrigado para moitas persoas, sobre todo para repoñer forzas tras unha noite de festa.
Pero a atención prestada polos seus empregados fixo que 'El Chiringuito' se convertese tamén nunha opción para comer ou cear algunha das súas numerosas especialidades.
A peonalización parcial de Benito Corbal hai uns anos permitiulle tamén estrear unha terraza a pé de rúa que, ao ser a única neste ámbito urbano, deulle un maior movemento nas horas centrais do día.
Co peche de 'El Chiringuito', situado ademais á beira da que foi outra mítica cafetería da rúa, o 'Green' que ocupa a tenda de Stradivarius, Benito Corbal queda orfa de sitios nos que tomar un refrixerio para descansar da xornada de traballo… ou das compras.