Os socialistas propoñen un Plan para evitar a sangría do desemprego xuvenil
Por Oskar Viéitez
O PSdeG presentará para o seu debate no Parlamento galego un plan de emprego e formación xuvenil, co fin de frear o paro nestas idades e lograr que regresen algúns dos que emigraron a outros países en busca de traballo.
O secretario de Emprego do PSdeG-PSOE, José Manuel Civeira, e o secretario xeral de Xuventudes Socialistas de Galicia, Aitor Bouza, presentaron este luns en Pontevedra a iniciativa, que pretende formular "propostas en positivo" para os mozos galegos.
Bouza destacou que a taxa de paro xuvenil é do 57% e criticou que unha de cada tres persoas que en 2009 estaban afiliados á Seguridade Social perderon o seu emprego "dende que chegou Feijóo" ao Goberno da Xunta.
Neste período, agregou José Manuel Civeira, sufrimos "unha fuga daqueles mozos altamente preparados, unha perda de capital humano". Por iso, un dos puntos nos que incidirá o plan de emprego é en tratar de "recuperar canto antes" eses mozos que se foron ao estranxeiro.
Non obstante, tamén achegará propostas para que "mentres estean fóra" teñan "cobertura", estean en contacto coa estrutura das administracións no exterior e vexan garantidos os seus dereitos.
Cibeira defendeu que un 8% dos 6.000 millóns de euros conseguidos polo Estado en fondos europeos para o desemprego xuvenil se destine a Galicia. E esixiron que a Xunta recupere o 40% que recortou do presuposto para políticas activas de emprego.
Os dirixentes socialistas reivindicaron un plan galego de emprego e formación xuvenil dotado de investimento económico por parte da Unión Europea, do goberno de España ou da Xunta, a e consensuado mediante a recuperación dun "observatorio de emigración xuvenil para despois estudar cal é o tratamento preciso", e tamén "os pactos territoriais e as iniciativas locais de emprego".
Finalmente reiteraron a súa esixencia ao Goberno para que derrogue a Reforma Laboral que definiron como "unha bomba de precariedade masiva".