Pontevedra, sede da única WordCamp en Galicia
Por Redacción
Un ano máis, a cidade de Pontevedra será a sede da única WordCamp de Galicia, un evento centrado no sistema de código libre co que se xestionan un terzo das páxinas web de todo o mundo, WordPress. Terá lugar os días 21 e 22 de setembro na Facultade de Ciencias Sociais e da Comunicación.
Organizado por voluntarios da comunidade WordPress Pontevedra co apoio da organización internacional WordPress Foundation, a segunda edición deste WordCamp agarda xuntar a 275 asistentes chegados desde diferentes puntos de España.
As entradas para participar teñen un prezo de 25 euros, agás no caso de estudantes universitarios que terán que pagar só dez.
A segunda edición da WordCamp abrirase o sábado 21 de setembro con 28 conferencias e charlas rápidas nas que se abordarán múltiples aspectos vinculados con este xestor de contidos web.
As WordCamp, segundo un dos seus organizadores, Juan Hernando, non están dirixidas só a expertos na creación de contidos web, xa que nas diferentes actividades que integran o seu programa se falará, entre outras cousas, de márketing, contidos, posicionamento en buscadores, accesibilidade, seguridade ou comercio electrónico.
Haberá actividades para persoas sen coñecementos previos e outras dirixidas a un público experto. "Cremos que é un evento do que a comunidade universitaria vai poder sacar moitas cousas para a súa futura vida profesional”, engadiu o representante da organización.
Este evento rematará o domingo 22 coa celebración do día do contribuídor, no que os participantes aprenderán a colaborar co propio proxecto de WordPress en labores de tradución, soporte, deseño, márketing ou desenvolvemento.