Localizan o mesmo condutor dúas veces en dous días conducindo bébedo e drogado en Poio
Por Redacción
A Policía Local de Poio localizou nos últimos días dúas veces con dúas xornadas de diferenza o mesmo home conducindo baixo os efectos do alcol e as drogas. A primeira vez, ademais, provocara un accidente.
Segundo a información facilitada pola Policia Local, o primeiro día foi interceptado tras recibirse a chamada dun veciño que vira un vehículo dando bandazos pola estrada PO-308 desde Poio cara a Sanxenxo. Os axentes sorprendérono cando entraba nun bar coa intención de seguir consumindo máis alcol. Antes de ser localizado, provocara un accidente na parroquia de San Xoán.
Os policías sometérono ás probas de consumo de alcol e drogas deu positivo en ambas, cunha taxa de 0.80 miligramos de alcol por litro de aire expirado e un positivo en consumo de cannabis no narcotest.
Dadas as taxas que presentaba, foi denunciado pola vía penal como suposto autor de dous delitos contra a seguridade viaria por circular baixo os efectos do alcol e as drogas. Os feitos foron postos en coñecemento do Xulgado de Garda de Pontevedra e a Policía tamén levantou atestado para iniciar unha reclamación de danos polo accidente que provocara.
Dous días despois, volveu ás andadas. A Policia Local detectouno circulando por unha vía de Poio e, cando o someteu ás probas de alcol e drogas volveu dar positivo en ambas. Nesta ocasión, a taxa de alcol foi de 0,54 miligramos de alcol por litro de aire expirado e non foi denunciado pola vía penal, senón tan só administrativa.
Os axentes formularon dúas denuncias por infraccións moi graves que poden derivar na retirada de seis puntos do carné e unha sanción económica de 1.000 euros.
Este condutor neglixente non é o único detectado nos últimos días en Poio. A Policía Local tamén detectou outro cun resultado positivo de 1,15 miligramos de alcol por litro de aire expirado, unha taxa cinco veces superior á permitida. O condutor solicitou repetir a proba para comprobar a presenza de alcol en sangue e tamén deu positivo, de modo que foi denunciado pola vía penal e será sometido a un xuízo rápido.