O portahelicópteros Juan Carlos I recibe os alumnos da Escola Naval para a súa instrución de fin de curso
Por Redacción
O buque Juan Carlos I fondeou este domingo na ría de Pontevedra. Trátase dun buque polivalente de tipo portahelicópteros que recibirá a bordo a 129 alumnos da Escola Naval Militar, que inician así o cruceiro de instrución de fin de curso. Está previsto que ao longo da travesía de adestramento os aspirantes visiten os portos de Rota, Málaga, Melilla e Lisboa.
Tras este embarque, todos os alumnos da Escola Naval Militar se encontrarán en fase académica de prácticas, de acordo cos seus respectivos plans de estudos.
- Os 92 Aspirantes de 1º e 2º do Corpo Xeral, embarcarán no Juan Carlos I ata o 7 de xullo.
- Os Aspirantes de 2º efectuarán o embarque no Juan Carlos I, así como no núcleo de Goletas pertencentes á Escola Naval Militar.
- Os Gardamarinas de 1º e os Aspirantes de 1º e 2º do Corpo de Infantaría de Mariña, efectuarán un campamento na Serra do Retín (Cádiz) do 9 ao 22 de xuño e posteriormente embarcarán os Aspirantes no Juan Carlos I, no porto de Rota e os Gardamarinas permanecerán no Tercio de Armada (TEAR) en San Fernando (Cádiz).
- Os Gardamarinas de 1º do Corpo Xeral, efectuarán o embarque en diversos buques da Frota, tanto da Forza de Acción Naval (FAN) coma da Forza de Acción Marítima (FAM). Realizaranse múltiples movementos de alumnos entre estes buques para aproveitar ao máximo as actividades das unidades.
- Os 11 Alféreces do Corpo de Intendencia, embarcarán no "Juan Carlos I" do 9 de xuño ao 7 de xullo.
Todos os alumnos regresarán á Escola Naval Militar non máis tarde do 9 de xullo, para os ensaios dos actos de xura de bandeira, entrega de Reais Despachos e nomeamento de oficiais.