Ofrecen unha recompensa de 1.000 euros para quen poida dar datos sobre o maltrato dun can de Mourente
Por Redacción
A asociación animalista Libera e a Fundación Franz Weber ofrecen unha recompensa de 1.000 euros á persoa que poida achegar información sobre o autor do lazo de caza que atrapou un can na parroquia pontevedresa de Mourente.
O can foi localizado pola protectora de animais Os Palleiros cun lazo de caza incrustado nunha das súas patas e este caso de malos tratos serve a estas dúas asociacións para reclamar maior control sobre o medio natural e estas prácticas irregulares, que cualifica de "tremendamente crueis".
Os animalistas avanzaron a activación desta nova recompensa económica para "seguir incentivando a ruptura do círculo de silencio" que se adoita dar en sucesos de malos tratos animais e que se repita neste. Ademais, aproveitan para lembrar casos pasados en Pontevedra como a cadela tiroteada e arroxada a unha tubaxe de pluviais o pasado ou os diferentes casos de cans abandonados.
Estes colectivos lembran que o uso de métodos non selectivos de caza é un delito e, ao colocar estes artefactos, o seu responsable pode expoñerse a penas de ata dous anos de prisión, que se unirían a posibles inhabilitacións para a práctica cinexética. Ademais, no caso de animais domésticos o acto tamén podería atopar a comisión dun delito de malos tratos, penado cun máximo de 24 meses de cárcere.
Neste sentido FFW e LIBERA! lembraron que a vía administrativa, a través da Lei de Benestar Animal, facultaría a apertura dun expediente sancionador por parte da Xunta de Galicia, con sancións que poderían ascender ata os 30.000€ e facer efectiva unha inhabilitación para a tenencia de animais por un máximo de 10 anos, polo que os defensores dos animais piden ao goberno autonómico que avalíe esta opción.