O BNG presenta nove iniciativas destinada a crear emprego en Marín
Por Oskar Viéitez
O Consello Local do BNG de Marín presentou este mércores en rolda de prensa a súa proposta para poñer en marcha un Plan de Emprego Municipal co obxectivo de combater a crítica situación da localidade con máis de 2.800 persoas en situación de desemprego.
O BNG presentou xa o seu plan a través dunha moción rexistrada no Concello, coa intención de que se recollan as propostas no orzamento municipal.
A portavoz do BNG, Pilar Blanco explicou que "propoñemos que o orzamento reserve 500.000 euros para un Plan Especial que se destinaría á contratación de persoal de limpeza de camiños e espazos naturais, peonaxe de servizos, obras, xardinería e auxiliares de axuda no fogar e un Plan fiscal que contemple a redución de taxas e impostos para o trienio 2013-2015 ás persoas con menos recursos e familias con todos os membros no paro".
O BNG propón un banco de locais comerciais baleiros e en desuso
Ademais propoñen a posta en marcha dun plan específico para autónomos e Pemes que consistirá en rebaixar a carga fiscal durante 3 anos a todo o tecido empresarial e comercial, a excepción das cadeas de alimentación, bancos e entidades financeiras e grandes empresas.
Na liña de favorecer a activación económica, os nacionalistas propoñen a bonificación do ICIO (imposto de construción) ata o 95% tanto a particulares como a empresas.
Outras propostas son a creación dun banco de locais comerciais baleiros e en desuso, por parte do Concello para ofertalos en réxime de aluguer accesible, é outra das propostas, ademais dun banco de terras e dun viveiro de empresas.
Dende o BNG cren que o Concello debe xogar un papel activo na procura de novas oportunidades de emprego.