Os bombeiros rescatan unha muller que caera nun pozo en Salcedo
Por Redacción
Os bombeiros do parque de Pontevedra rescataban na mañá deste domingo unha muller que se atopaba no interior dun pozo do seu domicilo no número 20 da Nacional 550 na parroquia pontevedresa de Salcedo.
Os fillos desta veciña de Cabanas deron a alarma ao 112 Galicia ás 08.15 horas, que avisou a axentes da Policía Local, Policía Nacional e aos Bombeiros.
Ao chegar ata a finca atoparon á muller, de 60 anos, consciente e agarrada a unha tubaxe no fondo do conduto. sen poder facer pé, a uns seis metros de altura. A auga chegáballe á cintura.
Un dos bombeiros utilizaba un trípode con cordas para o rescate e, coa axuda dun triángulo de evacuación, lograba extraer á muller do pozo. A vítima sufría síntomas de hipotermia e, segundo a Policía Local, foi trasladada ao Hospital Montecelo para sometela a un exame médico.