Inversores mexicanos queren mercar o Acuario do Grove
Por Oskar Viéitez
Os donos do Acuario de O Grove teñen tres ofertas de compra ou aluguer sobre a mesa.
A máis viable corresponde a un grupo de inversores mexicanos interesado en instalarse nas Rías Baixas e facerse coas instalacións de Punta Moreiras.
O acuario, aínda que en moi bo estado, permanece pechado ao público desde que a firma catalá que o gestionaba, Bluedisplays, presentase a suspensión de pagos e o concurso de acreedores.
Isto supón un escollo importante na negociación xa que impide aos donos das instalacións acceder ao interior libremente, e os traballadores, aínda que non están cobrando, seguen pertencendo a Bluedisplays.
Juan Búa, Alfredo Fernández e Manuel Ochoa, como propietarios do acuario, esperan pechar nas próximas horas un acordo que garanta o futuro do acuario de O Grove.