Ponte Caldelas planta cara ao despoboamento
Por Redacción
O Concello de Ponte Caldelas logrou durante o último ano plantarlle cara ao despoboamento que afecta ao rural de toda Galicia e pechou 2018 con 40 habitantes máis. O padrón creceu pola chegada de 264 persoas, mentres que só 160 decidiron ir vivir a outro municipio.
Segundo informou o Concello a través dun comunicado, os datos municipais indican que Ponte Caldelas pasou dos 5.491 habitantes do ano pasado aos 5.531. O alcalde, Andrés Díaz, destaca que Ponte Caldelas foi quen de consolidar e estabilizar poboación e, máis alá de que se suban uns cantos habitantes ou se perdan dun ano para outro, o importante é a liña base. Se se analizan os datos no contexto dos catro anos do mandato municipal resulta significativa a estabilidade do padrón, que en 2015 estaba nas 5.540 persoas, cifra practicamente idéntica á actual.
As cifras oficiais indican que Ponte Caldelas "é un concello atractivo para vivir", pois 104 persoas máis decidiron ir a vivir a Ponte Caldelas que as que optaron por desenvolver fóra o seu proxecto de vida.
Ponte Caldelas non é allea aos efectos da inversión da pirámide poboacional, que afecta a toda España e moi especialmente a Galicia, e así rexistrou 84 falecementos por só 33 nacementos, é dicir, un saldo negativo de 51 habitantes, dato que remarca aínda máis a importancia do crecemento producido este ano.
Segundo os datos municipais, unha boa parte dos novos residentes procede de concellos limítrofes, incluída a capital provincial, mentres que outra explícase polo retorno de emigrantes.
Díaz destacou tamén que ao revisar as series históricas de poboación pódese comprobar perfectamente como o Concello pasou de case 7.000 habitantes en 1996 a achegarse ata os 5.000 en 2014.