Chega o inverno, hora de empregar os funxicidas nos cítricos, pebidas e kiwis
Por Redacción
Este venres 21 entra o inverno e é importante que as persoas que contan con plantacións agrícolas coñezan como realizar as podas. É unha das recomendacións do persoal da Estación Fitopatolóxica de Areeiro (EFA), dependente da Deputación Provincial, que tamén alerta da necesidade de iniciar os tratamentos con funxicidas de cobre nos cítricos, frotais de pebida, óso e kiwi.
Tras un outono chuvioso apareceron síntomas de patoloxías nos cítricos e é necesario evitar a acumulación de auga nas zonas das raíces e comezar a aplicar funxicidas de cobre cando as condicións de chuvia o permitan. Será necesario que se renove en varias ocasións para que manteñan a súa efectividade.
Tamén se debe aplicar a outros froiteiros, de pebida, óso e ao kiwi en dosis elevadas, con renovacións periódicas durante as seguintes semanas sempre que as temperaturas non sexan demasiado baixas nin se rexistren xeadas nos días seguintes á aplicación.
En canto ás podas, aínda queda marxe de tempo suficiente para practicalas. Desde a EFA lémbrase que deben realizarse en tempo seco e preferiblemente sen vento. Os cortes son vías de entrada para os fungos patóxenos. Estes cortes deben ser limpos e o máis verticais posible.
As tesoiras de poda deberán desinfectarse entre plantas e sempre despois de facer un corte nunha póla enferma. Tamén hai que sanear as plantas eliminando as pólas afectadas ou as alteracións de madeira ata alcanzar unha zona limpa e sá.
Se a enfermidade afecta a toda a planta é preferible retirala e destruíla para evitar a contaminación na parcela. As plantas enfermas deben ser as últimas en podarse.
O equipo técnico da EFA lembra que moitos fungos son oportunistas e por iso é necesario que as plantas se atopen o máis fortes posible para que fagan fronte a unha posible infección. Por este motivo, lembran a necesidade de que as condicións do solo sexan as adecuadas, desde a estruttura física ata a dispoñibilidade de nutrientes.