Os bombeiros traballan cinco horas para sufocar un incendio nunha vivenda de Meis
Por Redacción
Os bombeiros de Ribadumia, os efectivos do parque de Vilagarcía e a Garda Civil traballaron durante cinco horas na madrugada deste sábado para extinguir un incendio que finalmente arrasou por completo unha vivenda no Concello de Meis.
Segundo informou o Centro de Atención de Emerxencias de Galicia 112, todo comezou ás 3.20 horas da madrugada.
Un veciño chamou para avisar dun incendio no interior dunha vivenda situada no número 20 da parroquia de Paradela e insistiu en que o lume collía forza e era necesaria a rápida intervención dos efectivos do servizo de prevención, extinción de incendios e salvamento do Salnés.
O 112 pediu a colaboración dos bombeiros de Ribadumia que, coa axuda dos efectivos de Vilagarcía, fixeron fronte ás lapas ata a súa completa extinción. As tarefas prolongáronse durante máis de cinco horas co obxectivo de controlar e perimetrar o incendio e evitar deste xeito que se propagase ao monte e a unhas construcións tipo bungalós instaladas no recinto da mesma propiedade.
Finalmente, ninguén resultou ferido, aínda que o lume causou cuantiosos danos materiais. De feito, a vivenda quedou completamente calcinada.