Un centenar de escolares 'póñense a conducir' en Poio
Por Redacción
Preto de 100 escolares de cursos de educación infantil e primaria de colexios de Poio e da súa contorna participaron este sábado no obradoiro de seguridade viaria 'Ponte a conducir Poio', organizado pola Policía Local, a Xefatura Provincial de Tráfico, a Garda Civil de Tráfico, Protección Civil, Cruz Vermella e empresas e entidades colaboradoras.
A actividade realizouse a partir das 10.00 horas deste sábado no circuito de educación viaria da Seca e, como xa sucedeu o ano pasado, os escolares ditribuíronse por idades en grupos de 30 e foron rotando polas diferentes actividades que se desenvolveron ao longo da mañá.
Os participantes estiveron no circuito de educación viaria, participaron nun concurso de debuxo, coñeceron os vehículos e medios de atención en pro da seguridade viaria e pasaron pola aula práctica da Cruz Vermella.
Ademais, puideron presenciar un simulacro dun accidente de tráfico no que tiveron oportunidade de ver despregados todos os servizos de emerxencias implicados nestes sinistros.