Sogama entrega medio cento de composteiros no Grove e Rodeiro
Por Redacción
Os concellos pontevedreses de O Grove e Rodeiro decidiron ampliar, co apoio de Sogama, os seus programas de compostaxe doméstica a fin de seguir reducindo a presenza de materia orgánica nos contedores verdes convencionais e, desta forma, aforrar custos ambientais e económicos.
Un total de 50 novas vivendas unifamiliares (25 por localidade) sumaranse a esta iniciativa. Requisito imprescindible é que dispoñan de horta ou xardín no que aplicar o compost resultante do proceso de fermentación controlada dos residuos orgánicos, labor para a cal contarán cun composteiro de 350 litros de capacidade cedido pola empresa pública e fabricado con materiais reciclados e reciclables.
Esta nova partida únese a outras entregadas anteriormente por Sogama nestes municipios, facendo un total de 80 no caso de Rodeiro e 70 no de O Grove.
Dado que esta fracción de residuos representa en torno ao 42% na composición global dunha bolsa de lixo tipo, se se consegue pechar o ciclo de reciclaxe da mesma nos propios fogares, os beneficios a alcanzar son moi importantes, xa que os entes locais poderían reducir a frecuencia de recollida e transporte dos contedores xenéricos, coa conseguinte diminución dos niveis de CO2, e entregar menos residuos a Sogama para o seu tratamento final.
Ademais de todo isto, o programa tamén posibilita unha serie de vantaxes sociais que non sempre son tidas en conta, toda vez que, a través do mesmo conséguese recuperar unha práctica tradicional en Galicia, como é a segregación dos residuos orgánicos para alimento do gando ou elaboración de abono, coa particularidade de que, ao xestionar estes desperdicios en orixe, aplicando en toda a súa amplitude o principio de proximidade, redúcense os desprazamentos da poboación aos contedores de recollida selectiva, xa que os envases non desprenden cheiros e poden acumularse varios días nos domicilios.
A día de hoxe Sogama xa distribuíu máis de 8.200 composteiros entre distintos colectivos sociais galegos (concellos, centros escolares e outros colectivos).