Detido un veciño de Vilanova por comprar maquinaria e ferramentas roubadas
Por Redacción
Axentes da Policía Nacional, o pasado miércoles día 8, procederon á detención dun home, de 39 anos de idade, veciño do municipio de Vilanova de Arousa, como presunto autor dun delito de receptación por compra-venda de efectos subtraídos.
A mesma enmárcase e é continuación da detención de tres persoas o pasado día 2 de maio, a quen lles foron imputados varios delitos de roubo con forza nas cousas, receptación, e a un deles un delito por cultivo de plantas de marihuana, sendo intervidos a estes individuos parte dos efectos subtraídos nos feitos delituosos en que supostamente participaron. A nova xa foi publicada por PontevedraViva
Dado que parte dos efectos denunciados como subtraídos non foron achados en poder dos presuntos autores dos roubos, os axentes continuaron as investigacións para tratar de recuperalos. Froito diso, púidose identificar ao presunto comprador. Sendo achadas no seu poder diversas máquinas e ferramentas, as cales foron intervidas e trasladadas a Comisaría de Vilagarcía onde están depositadas, ao obxecto de tratar de determinar a súa procedencia, así como os seus propietarios.
Desde a Comisaría do Corpo Nacional de Policía de Vilagarcía, faise un chamamento á cidadanía para que, se foron vítimas dalgún roubo de maquinaria, ferramentas ou outros obxectos, acudan a estas dependencias ao obxecto de que poidan comprobar personalmente estes efectos e, no seu caso, para que poidan proceder á súa recuperación.
O detido foi posto a disposición do Xulgado de Instrución número un de Vilagarcía, en funcións de garda.