O lume arrasa un ático no Grove sen causar danos persoais
Por Redacción
Un incendio provocou que ardera toda a primeira planta dun dúplex, con cociña e salón, este sábado no centro urbano do Grove, na rúa Fontegrande.
A alerta chegaba ao Servizo de Emerxencias do 112 Galicia ao redor das 13.00 horas a través de efectivos do servizo de emerxencias local. Desde o Centro Integrado de Atención ás Emerxencias avisábase aos bombeiros de Ribadumia e aos membros do Grupo de Emerxencias de Sanxenxo.
As chamas causaron numerosos danos materiais e o ático quedou practicamente calcinado, segundo a información facilitada polo 112 Galicia.
A pesar destes cuantiosos danos, non se rexistrou ningún ferido neste suceso. Segundo as primeiras indagacións, a orixe do lume estaría nun aparato eléctrico.