A Policía Local do Grove actualiza a súa frota de vehículos
Por Redacción
A Policía Local do Grove acaba de incorporar dous novos vehículos que permitirán retirar da frota municipal coches que xa es atopaban en mal estado. É o primeiro investimento en vehículos para este servizo municipal en seis anos, o que implica que xa hai algúns coches policiais con máis de 14 anos.
O Concello presentou este xoves os dous vehículos. Un é de segunda man adquirido co remanente de tesourería do ano 2016 e o outro é un coche de renting totalmente equipado.
Os novos vehículos melloran notablemente os recursos materiais a disposición do corpo de seguridade local xa que contan cun equipamento máis adaptado aos tempos actuais e que atende ás necesidades reais do servizo.
Os vehículos policiais existentes ata agora precisaban un mantemento moi custoso, de modo que os novos coches supoñen un notable aforro de recursos tanto polo mellor rendemento de consumo como por evitar eses gastos. Tamén garanten que o servizo mellore a súa imaxe, unha cuestión importante en calquera localidade e máis nun concello tan turístico.
A incorporación destes novos vehículos permite a baixa dunha unidade que se atopaba en moi mal estado e trasladar outra unidade do servizo de patrulla ao de notificación.
A adquisición do vehículo de renting supón que por unha cota mensual se dispoña dun coche policial de última xeración con todo o mantemento completo incluído, incluso o seguro a todo risco. Este vehículo contará cun kit de emerxencias que incluirá un desfibrilador DESA e melloras tan significativas como luminarias adaptadas á nova normativa.
Ademais, ten, soportes para as ferramentas de traballo da Policía (por exemplo colocación das porras nas portas), cargador de lanternas de seguridade no interior do vehículo, cortinillas de intimidade nas portas traseiras, chalecos anti-balas ou asentos reforzados adaptados aos cintos que empregan os municipais.