Vilarchán recupera 38 anos despois unha antiga tradición popular
Por Redacción
Os fregueses de Vilarchán, en Ponte Caldelas, recuperaron este sábado unha antiga tradición popular, o encontro entre as dúas imaxes da Virxe dos Remedios existentes no pobo, a da capela de San Miguel e a que é propiedade dunha coñecida familia.
A reunión entre as virxes celebrábase anualmente cunha misa o último domingo de xullo, coincidindo coas festas, pero que se truncou por decisión do anterior párroco hai 38 anos chegando a provocar a queixa dos veciños ante o Arcebispado de Santiago.
O novo sacerdote, Juan Manuel Fernández, que tomou posesión o pasado mes de novembro apostou por recuperar esta tradición e sen esperar ao verán oficiou unha misa que desbordou o templo.
As dúas imaxes foron colocadas ao lado do altar. Tras a cerimonia a 'filipina', chamada así porque chegou a Vilarchán desde esas illas en 1711, volveu á casa da súa propietaria, Erundina Malvar.
Ao final, toda a veciñanza xuntouse na Casa do Pobo para gozar dunha chocolatada con rosca para celebrar a ocasión. Aos actos acudiron en representación do goberno local o alcalde, Andrés Díaz, e o concelleiro Manuel Barreiro.