Por que Vigo está no Monopoly e Pontevedra non? Vota!!!
Por Redacción
Pontevedra non alcanza os 200 votos pero aínda ten marxe de tempo para ser unha das 20 capitais que figure na vindeira edición do Monopoly España. Ata o 17 de marzo permanecerá aberta a campaña na que calquera particular pode votar a través da súa web o da páxina oficial de Facebook do coñecido xogo de mesa.
A presentación desta proposta realizábase o 17 de xaneiro na Feira Internacional de Turismo FITUR en Madrid e xa comezaron os duros enfrontamentos entre as distintas capitais ao igual que entre diferentes vilas españolas.
Nestes momentos, lugares como Alcobendas (Madrid) atópanse entre os 20 primeiros superando os 60.400 votos, con Pedroso (La Rioja) destacando con máis de 210.000 apoios despois de que se desenvolvera unha campaña social nesta localidade. Entre as 25 primeiras localidades non aparece aínda unha cidade galega, posiblemente debido á falta de promoción da campaña nestas latitudes.
Monopoly xa realizara una iniciativa parecida en 2009. Naquela ocasión, os participantes escolleron, entre outras cidades, a Cádiz, Xaén, Palencia, Badaxoz, Barcelona, Santander, Pamplona ou Vigo. A cidade olívica forma parte desde entón do popular taboleiro. Pola contra, a capital da provincia non aparece aínda neste xogo, que conta con millóns de seguidores en todo o planeta.
O 19 de febreiro, Mr. Monopoly dará a coñecer as 20 cidades e as dúas vilas que formen parte da nova edición, que está previsto que saia á venda no vindeiro nadal.
Os pontevedreses aínda teñen a oportunidade, a través do seu voto en internet, de conseguir a aparición do municipio nesta versión española do xogo de venda de propiedades inmobles. Outras cidades galegas como Ferrol tamén participan neste "pique" por ser un lugar de diversión, sempre dependente do azar que marquen os dados.