Os condutores de Pontevedra, os que menos defraudan ao seguro
Por Redacción
Home de entre 18 e 24 anos, desempregado ou con traballos precarios. Ese é o perfil do condutor fraudulento, segundo o barómetro da fraude no seguro de autos que presentou en Madrid a compañía Línea Directa. Iso si, Pontevedra atópase entre as provincias cuxos condutores son máis "honestos" á hora de dar parte ao seguro.
Nos últimos anos, segundo este informe, Soria, Teruel e Pontevedra son as zonas con máis fraudes cometidas por condutores. En todas elas, menos dun 5% dos partes que se cobren por accidente resultan ser falsos.
O importe medio das estafas alcanza os 1.286 euros.
En canto á súa tipoloxía, incluír no parte danos alleos ao sinistro segue sendo a estafa máis habitual nas fraudes materiais (80,5%). Séguenlle, a máis distancia, as montaxes (12%), o falso furto (2,2%) e as fraudes por orzamentos inflados (1,9%).
En canto ás lesións, a inmensa maioría (99%) son simulacións ou falsos agravamentos dun dano real, mentres que no 1% dos casos trátase de cobrar por lesións sufridas antes do sinistro.
A cifra defraudada ás compañías de seguros ascende a 833 millóns de euros ao ano.
Por xénero, os homes cometen máis fraude que as mulleres, fundamentalmente para ter o coche impoluto e son máis categóricos á hora de afirmar que non se arrepinten das fraudes cometidas.
As mulleres, pola súa banda, simulan máis lesións que os homes, descoñecen máis as consecuencias xurídicas das estafas e adoitan enganar ás súas compañías “porque necesitan o diñeiro”, segundo o estudo realizado por Línea Directa.
Aínda que esta práctica sexa reprobable, Francisco Valencia, director de goberno corporativo de Línea Directa, asegura que o problema que máis preocupa aos equipos antifraude das compañías é o das mafias organizadas: bandas profesionais que se dedican a defraudar de forma sistemática e que, habitualmente, están vinculados a outro tipo de delitos.
Neste sentido, o número de redes delituosas detectadas por Línea Directa desde 2013 ascende a case 400 bandas diseminadas por todo o territorio nacional.