A segunda fase das obras de saneamento do Gafos obrigan a pechar o paseo peonil
Por Redacción
As obras de mellora do saneamento no tramo urbano do río Gafos chegaron este luns á súa segunda fase. Comezaron as actuacións na zona entre a estación de autobuses e Ponte Boleira, que a partir da tarde deste luns manterán cortado o paseo peonil.
A portavoz do goberno local, Anabel Gulías, anunciou que é necesario pechar o paseo entre a estación e Ponte Boleira por seguridade e para facer provisión de material. De momento, descoñécese ata cando permanecerá pechado, pois o calendario das distintas actuacións coñecerase este martes tras unha reunión técnica celebrada entre o Concello e a empresa adxudicataria.
Todo o proxecto adxudicouse á UTE Construtora Ediserpo S.L. - Ogminos Proxectos S.L. por 831.116,30 euros e divídese en dúas fases. A segunda é a que comeza esta semana, despois de que semanas atrás xa se actuase na contorna de Otero Pedrayo. Á hora de fixar o calendario das obras este martes, o Concello fará fincapé en acelerar os traballos o máximo posible.
A actuación, financiada entre a Deputación e o Concello de Pontevedra, permitirá recoller as augas do polígono da Reigosa, Vilaboa e das parroquias de Marcón, Tomeza e parte de Salcedo para que vaian á depuradora sen filtracións de auga. Gulías destacou que permitirán "garantir que as augas do cauce do río sexan limpas" e que as fecais non se mesturen coas augas limpas.
"O coidado dos recursos hídricos debe ser unha prioridade para as administracións", destaca Gulías, e esta actuación demostra que a implicación do Concello de Pontevedra. De feito, a portavoz municipal destacou que todos os atrasos que poidan producirse neste proxecto non se poden atribuír á administración local.
DOUS MILLÓNS EN OBRAS
A Xunta de Goberno local deste luns tomou coñecemento do inicio das obras e, ademais, aprobou actuacións por un importe próximo aos dous millóns de euros tanto na zona urbana como no rural de Pontevedra.
A actuación máis elevada é a que afecta á reforma integral da rúa Cruz Vermella. O goberno local aprobou o expediente da actuación, que ascende a 1,4 millóns.
Ademais, adxudicouse á empresa Ediserpo por 180.337 euros a instalación dun ascensor, a mellora da accesibilidade e habilitar aseos para persoas ostomizadas no pavillón municipal de Deportes. A actuación ten un prazo de execución de catro meses.
Tamén se aprobou o expediente para a rehabilitación superficial de camiños de acceso a varios lugares da parroquia de Campañó por 75.652,67 euros e o inicio do expediente de mellora da eficiencia enerxética da iluminación pública na Canicouva e nos lugares de Acevedo e Rañadoiro, en Ponte Sampaio.