Carmela Silva reivindica no Senado o papel de concellos e deputacións na cooperación internacional
Por Redacción
A presidenta da Deputación de Pontevedra, Carmela Silva, reclamou no Senado a participación activa dos concellos e das deputacións na elaboración do Plan Director 2018-2021, que regulará o rumbo da cooperación internación en España e o cumprimento dos obxectivos da 'Axenda 2030' da Organización das Nacións Unidas (ONU).
Carmela Silva, que protagonizou nas últimas semanas unha polémica ao non comparecer ante Parlamento de Galicia apelando á autonomía das deputacións, compareceu este mércores ante a Comisión de Cooperación Internacional para o Desenvolvemento da Cámara Alta.
Na súa opinión, a participación dos concellos e deputacións na elaboración das directrices en materia de cooperación internacional son "fundamentais". "Ou se fai coas entidades locais ou non se fará", mantivo no Senado.
Carmela Silva reivindicou que as entidades locais son consideradas, na teoría, como administración do Estado, pero na práctica "seguimos a ser un axente de segunda categoría mantendo unha tutela sobre todas as nosas accións" a pesar de que "temos un forte compromiso con este novo modelo de cooperación que fixa a ONU".
"Temos que reclamar que sexamos considerados un actor dentro do plan director de cooperación do goberno de España", pediu Carmela Silva, que recoñeceu que a nova Axenda 2030 da ONU pon o centro das súas iniciativas globais as persoas, "algo que as entidades locais vimos desenvolvendo dende fai anos e aínda que esta actuación de cooperación é global ao final o estamos a desenvolver dende o local".
Carmela Silva tamén subliñou o compromiso que comunidades como País Vasco, Cataluña, Andalucía, Castela-León ou Valencia teñen cos obxectivos da Axenda 2030 con propostas moi avanzadas, pero iso "non está ocorrendo en Galicia", onde mantén que "non están entre as prioridades políticas" do goberno da Xunta.
Desde o Senado, reclamou ao goberno de Alberto Núñez Feijóo que defina con claridade "as liñas e accións concretas que van desenvolver para implementar a Axenda 2030 na política de cooperación internacional en Galicia" e os seus plans de seguimento e avaliación.