Un preso de permiso conduce un coche sen ter carné, ten un accidente e dáse á fuga
Por Redacción
A Policía Local de Marín identificou este martes un condutor que tivo un accidente ao chocar cun coche estacionado e, a continuación, deuse á fuga. Posteriormente, comprobaron que se trata dun preso que estaba a gozar dun permiso penal e que non ten carné de conducir porque nunca o sacou.
Segundo informou a Policía Local de Marín, os feitos ocorreron sobre as 4.20 horas da madrugada deste martes 14 de novembro. Unha testemuña viu que un turismo circulaba a gran velocidade pola rúa Ezequiel Massoni, dirixiuse cara Recamán e, nun momento dado, o condutor perdeu o control do vehículo, derrapou varios metros e chocou con outro que se atopaba estacionado. Tras o accidente, o condutor deuse á fuga.
A Policía Local de Marín puxo en marcha unha investigación que permitiu localizar o vehículo e, ao mesmo tempo, descubrir quen era o condutor. Trátase dun home natural de Canarias que carece de permiso de conducir por non obtelo nunca e que se atopaba gozando dun permiso penal.
O mozo está a cumprir condena no centro penal da Lama e, segundo fontes policiais, é reincidente polos mesmos feitos, dado que hai meses foi sorprendido ao volante doutro vehículo sen ter permiso.
O condutor está a ser investigado como responsable de dous delitos contra a seguridade viaria e as dilixencias serán remitidas ao xulgado.