Antonio Martínez Calvo, novo xerente executivo do Hospital do Salnés
Por Redacción
O conselleiro de Sanidade, Jesús Vázquez Almuiña, presentou este mércores a Antonio Martínez Calvo, que vai ocupar a praza de xerente executivo do Hospital do Salnés.
Licenciado en Medicina e Cirurxía pola Universidade de Santiago, doutor en Medicina pola Universidade da Coruña, especialista en Medicina Preventiva e Saúde Pública, e diplomado en dirección médica de hospitais pola Escola Nacional de Sanidade, Antonio Martínez Calvo conta cunha ampla experiencia no campo da xestión sanitaria.
Entre os numerosos cargos que ocupou na sanidade pública galega destaca o de subdirector xeral de Atención Especializada do Servizo Galego de Saúde, no ano 1991 e director provincial do mesmo organismo na provincia da Coruña. Ademais, foi director xerente do Hospital Virxe da Xunqueira do ano 2004 ao 2006 e subdirector xeral de Inspección, Auditoria e Acreditación do Sergas, no ano 2009.
Asemade, o novo xerente executivo do Hospital do Salnés é autor de numerosas ponencias e publicacións así como de proxectos de investigación.
No acto estiveron presentes, así mesmo, o xerente do Servizo Galego de Saúde, Antonio Fernández Campa; o xerente de Xestión Integrada de Pontevedra e Salnés, José Ramón Gómez Fernández; e a xefa territorial de Sanidade, Ángeles Feijoo.