Folga na empresa responsable da seguridade na Subdelegación de Defensa en Pontevedra
Por Redacción
Os traballadores da empresa Marsegur, responsable da seguridade no edificio da Subdelegación de Defensa en Pontevedra, convocaron dous días de folga xeral en protesta polas súas condicións laborais que, entre outras cuesiones, inclúen falta de pagamentos nas nóminas.
A folga xeral en Marsegur está convocada por UXT, CCOO e USO e prolongarase ata a medianoite deste martes 26 de setembro. Os sindicatos convocantes denuncian que esta empresa é "un claro exemplo de empresas que non deben operar nun marco de seguridade privada que garanta condicións laborais e de calidade de servizos".
Ademais, a empresa está a ser investigada pola Dirección Especial de Inspección de Traballo por presunta infracción en cotizacións á seguridade social a instancias de UXT e aplica un convenio cunha sentenza en contra da Audiencia Nacional.
Os sindicatos convocantes manteñen que "non pode seguir impune" ante estes "graves incumprimentos" cos seus traballadores, así como coa propia Lei de Seguridade Privada. Lembran que o Goberno central é un dos máximos clientes desta empresa en materia de seguridade privada e consideran que as situacións denunciadas son "elementos máis que suficientes" para que deixe de seguir impasible ante esta situación.
No caso de UXT xa solicitaron á ministra de Defensa, María Dolores de Cospedal, que resolva o contrato do ministerio coa empresa en cuestión.