A asociación Alba recibe tres tornos do antigo obradoiro "Teucro"
Por Redacción
A asociación de familiares e amigos de enfermos psíquicos "Alba" de Pontevedra recibiu este venres tres tornos do antigo obradoiro "Teucro". O secretario territorial da delegación da Xunta, Ramón Pereiro e o xefe territorial de Educación, César Pérez Ares, realizaban a entrega ao director do colectivo, Roberto Fernández.
Os tornos proceden do antigo Obradoiro Gráfico Teucro de gravado e cerámica, pertencente á extinta delegación da Consellería de Cultura e serán destinados a fins educativos e formativos no centro de rehabilitación que a entidade ten na Cidade Infantil Príncipe Felipe.
A asociación rehabilitará os tres tornos e a base para que os usuarios, un 50% de rehabilitación psicosocial, poidan utilizalos no taller para traballar con esmaltes, plástica e cerámica.
A asociación Alba é unha entidade sen ánimo de lucro que promove as intervencións no ámbito de saúde mental non cubertas polas institucións. Conta cun centro de rehabilitación psicosocial con 50 prazas, con catro pisos protexidos para un total de 20 usuarios, ademais de ofrecer atención domiciliaria.