A tradicional procesión das antorchas volve iluminar a noite da Insua
Por Redacción
A parroquia de A Insua, en Ponte Caldelas, volveu acoller esta fin de semana a súa singular e tradicional procesión nocturna, coñecida como procesión das antorchas e que cada penúltimo sábado de agosto pon o colofón ás festas en honor a Virxe das Dores.
A marcha saíu pasadas as dez da noite e prolongouse durante preto de dúas horas, ata case a medianoite, un percorrido en silencio tan só interrompido pola música da banda da Unión Musical de Tenorio no que os participantes camiñaron por un camiño marcado polas alfombras florais elaboradas polos veciños. Realizou todo o percorrido a imaxe de Santa Mariña, patroa de A Insua, portada por voluntarios da parroquia que fixeron relevos.
A veciñanza pasa días elaborando as numerosas alfombras florais que engalanan o percorrido da procesión, que só pisan as autoridades relixiosas e os portadores da imaxe. Este ano sumáronse tamén tapices no adro da igrexa coas patroas de cada un dos catro lugares da parroquia de A Insua, así como diversas mensaxes de saúdo aos visitantes que acoden a presenciar o evento.
A procesión saíu do adro da igrexa e transitou por camiños estreitos e antigas corredoiras, para rematar nunha forte pendente que conduce á praza central da parroquia. Durante todo o percorrido, estivo iluminada polos pequenos fachos que portan os seus participantes e os que se colocan nos muros e nas casas, case todas elas engalanadas para este día.
O alcalde, Andrés Diaz, asistiu ao acto relixioso e tomou a palabra ao final da procesión para felicitar á xente da comisión organizadora por manter viva a tradición e polo esforzo de organizar todos os detalles dun evento que segue atraendo a centos de persoas mesmo de fóra da parroquia.