Detidos tres mozos cando facían pintadas nunha casa con spray roubado noutra
Por Redacción
A Policía Nacional detivo o pasado martes 11 de xullo tres homes como presuntos autores dun delito de roubo con forza nun domicilio de Vilagarcía de Arousa do que levaron ferramentas eléctricas, instrumentos musicais de gran valor, equipos de son e sprays de grafiti.
Ademais do roubo en si, e de que foron detidos hai escasos días pola Garda Civil por outros delitos, resulta rechamante a forma en que se produciron os seus arrestos. Unha patrulla policial observou a varios mozos realizando pintadas na fachada dunha vivenda e, cando lles deu o alto, comprobou que estaban a utilizar sprays que subtraeran nunha casa próxima.
Tras a súa detención, os axentes comprobaron que formaban parte dunha banda desartellada recentemente pola Garda Civil de Cambados por decenas de roubos no interior de trasteiros anexos a vivendas en toda a comarca do Salnés.
Ademais, a un dos tres detidos desta semana atribúenselle outros dous delitos, un polo furto dunha televisión e xoias na casa da súa noiva e outro pola apropiación indebida a de bicicleta dun amigo.
Os tres foron postos a disposición xudicial en Vilagarcía e quedaron en liberdade, pero en calidade de investigados.