Un condutor de Poio, denunciado por usar a tarxeta de mobilidade reducida dun falecido
Por Redacción
Axentes da Policía Local de Poio identificaron un condutor por aparcar en espazos reservados para persoas con mobilidade reducida cunha tarxeta a nome dun home, natural de Ourense, falecido o pasado mes de xullo.
Foi localizado o 28 de abril, contra as 18.00 horas, aparcado nunha destas prazas, situada na rúa Ramón Encinas de Raxó.
Aparentemente, o home non tiña ningunha dificultade de mobilidade, polo que os axentes comprobaron a tarxeta. Durante este proceso, o condutor explicou que se trataba da tarxeta do seu xefe, que residía no concello de Ourense.
Con todo, a Policía Local descubriu que o titular da tarxeta falecera en xullo de 2016 na cidade das Burgas, polo que se procedeu a investigar ao identificado por un presunto delito de falsidade documental e uso fraudulento deste tipo de tarxetas.
Esta infracción foi detectada na campaña que levou a cabo a Policía Local de Poio entre os días 24 de abril e 7 de maio, para controlar os estacionamentos nas prazas reservadas para persoas con mobilidade reducida.
O obxectivo foi vixiar os espazos de estacionamento reservados para estas persoas, delimitados e sinalizados correctamente. Con esta medida trátase de evitar o uso impropio e fraudulento de tarxetas concedidas.
Os veciños, apuntan desde a Policía Local, comezan a concienciarse do uso debido das prazas reservadas para facilitar o estacionamento as persoas que realmente o necesitan. Nestes quince días que durou a campaña denunciáronse catro vehículos por infracción administrativa, ademais da infracción penal anteriormente citada.
A Policía realizou un estudo para determinar se o número de estacionamentos destinados a persoas con mobilidade reducida era axeitado, contabilizando un total de 50 prazas reservadas nunha poboación de case 18.000 habitantes.
O reparto de prazas atende os criterios de poboación, vías e solicitudes atendidas, estando 23 delas en San Salvador, 8 en San Xoán, 10 en Combarro e 9 en Raxó.
Relacionadas:
-
Campaña da Policía Local de Poio sobre o uso das tarxetas de parking para persoas con mobilidade reducida
Por Redacción |
-
Poio inicia unha campaña de control do estacionamento en prazas reservadas para persoas con discapacidade
Por Redacción |
-
A Policía Local de Poio, disposta a sancionar o "estacionamento abusivo" dos pais nos accesos aos colexios
Por Oskar Viéitez |