As temperaturas baixarán a partir do Venres Santo
Por Redacción
As Rías Baixas quedarán a partir deste xoves nunha situación intermedia entre as altas presións que proceden do norte da península Ibérica e as baixas centradas sobre Azores.
Desta forma, o ceo permanecerá pouco nubrado ou despexado en xeral, salvo no litoral atlántico onde se prevé a presenza de néboas. As temperaturas durante o Xoves Santo non sufrirán cambios significativos, tanto as mínimas como as máximas situándose entre os 9 e os 25 graos. O vento soprará de dirección variable.
Para o Venres Santo, a situación meteorolóxica virá marcada polo enfraquecemento transitorio das altas presións permitindo a entrada dunha masa de aire algo máis fresca e húmida que durante estes últimos días.
Isto levará a presenza de ceos parcialmente nubrados, con nubes algo máis compactas no litoral oeste con posibilidade dalgunha choiva débil, segundo as previsións do Servizo de Meteogalicia. As temperaturas sufrirá un descenso, que terá carácter moderado nas máximas movéndose entre os 9 e os 19 graos. Os ventos soprarán frouxos de dirección variable.
Durante a fin de semana, o sábado recuperaranse as condicións anticiclónicas sobre Galicia. As nubes desaparecerán e as temperaturas manteranse entre os 10 e os 21 graos. O vento soprará frouxo de dirección variable.
Xa o domingo, as Rías Baixas atoparanse baixo a influencia anticiclónica polo que o prognóstico máis probable, segundo Meteogalicia, é o de tempo seco e moi asollado, ademais o anticiclón achegará de novo aire cálido desde o sur, de forma que se esperan, de novo, temperaturas elevadas durante a tarde chegando aos 24 graos.