Louro culpa a Ana Pastor de ter parados os proxectos de circunvalación e da conexión coa Meseta
Por Redacción
As respostas da ministra de Fomento, Ana Pastor, ás preguntas parlamentarias do PsdeG-PSOE provocaron o malestar no tenente de alcalde de Pontevedra, Antón Louro, que considera que Fomento non vai finalizar esta lexislatura nin un só dos tramos da circunvalación de Pontevedra nin tampouco da conexión da cidade coa Meseta.
Louro cualifica de "pouco seria" a tardanza e o contido da resposta da ministra ás preguntas que foran formuladas xa a principios de 2012.
O departamento de Ana Pastor confirma que aínda non tomaron ningunha decisión para conectar Pontevedra coa A-52. Por este motivo seguen estudándose as alternativas da A-57 (por Confurco) e da A-59 (por Peinador). Indica que a A-5 está dividida en 7 tramos, todos en fase de proxecto, salvo o da prolongación entre Pontevedra e Barro para o que "se está a redactar o estudo informativo". Non obstante, segundo o concelleiro socialista, é un dato incorrecto porque se encontra en fase de información pública.
En relación coa A-59, Fomento indica que se divide en tres tramos que están en fase de proxecto. Louro cre que Ana Pastor segue sen querer concretar o trazado polo que vai optar.
En relación coa circunvalación, Fomento prevé investir ao redor de 20 millóns de euros ata 2015. E Louro cre que non se vai finalizar ningún tramo porque só dous dos tres previstos están estimados en 185 millóns de euros.
O tenente de alcalde lamenta que estas dúas infraestruturas viarias, fundamentais para o desenvolvemento económico de Pontevedra, están en "rigor mortis".