Os veterinarios pretenden converter a Pontevedra en sede permanente do seu Congreso do Noroeste
Por Oskar Viéitez
O comité organizador do Congreso de Veterinarios do Noroeste pretende que a cidade de Pontevedra se converta na sede permanente deste foro profesional. Por segundo ano consecutivo o Pazo da Cultura de Pontevedra acollerá esta importante cita, o fin de semana do 31 de maio e 1 e 2 de xuño.
O alcalde, Miguel Anxo Fernández Lores, recibiu hoxe aos representantes do Colexio Oficial de Veterinarios de Pontevedra, Luis Núñez, Antía Piay e Licio Ferradás, trasladándolles a súa "gran satisfacción" por que esta cita "teña continuidade todos os anos e sexa unha cita obrigada".
Segundo trasladou Luís Núñez, existen tres grandes citas nacionais para os veterinarios: Madrid, Barcelona "e a nosa de Pontevedra". Para manter este nivel unha vez máis se conta con ponentes "de alta cualificación internacional" ademais de talleres específicos, seminarios, espazos expositivos e unha referencia singular aos auxiliáres técnicos veterinarios.
Do mesmo xeito que o pasado ano espérase que participen no congreso unhas 600 persoas "dun sector que mantén certa capacidade adquisitiva a pesar da crise", comentou o alcalde.
Desde o comité organizador destacaron que "temos a sorte de que xa non é necesario saír a vender o produto senón que viñeron a comprarnos a nós expresamente", afirmaron.
Finalmente o Fernández Lores asegurou que no Concello "xa estamos facendo encaixe de bolillos para combinar as cousas e que non coincidan todos os eventos na mesma data, xa que citas coma esta esgotan a capacidade hoteleira da cidade", concluiu.