A Festa da Troita busca o seu cartel para este ano
Por Redacción
Un ano máis, a Festa da Troita de Ponte Caldelas buscará a súa imaxe nun novo concurso de carteis. Os interesados en participar poderán presentar os seus traballos ata o próximo 31 de marzo, segundo avanzou este mércores o goberno municipal.
O concurso de carteis está aberto aos formatos comprendidos entre 45x100 e 75x100 centímetros coa inclusión obrigada das lendas LI Festa da Troita e Ponte Caldelas 2017. Cada artista poderá presentar un máximo de dous traballos, que deberán entregarse nas oficinas municipais. Establécese un único premio de 400 euros para o gañador.
Xunto a este concurso, Ponte Caldelas puxo en marcha tamén os certames de redacción e fotografía.
O concurso escolar de Redacción inclúe dúas categorías (de 9 a 11 anos e de 11 a 18 anos). A temática debe versar sobre as tradicións, festas, paisaxes, contos ou calquera outro tema sobre Ponte Caldelas, así como o concepto de sostibilidade e medio ambiente. Poderanse presentar escritos a man, sempre que a letra sexa lexible.
Os traballos entregaranse no Centro Cultural de Ponte Caldelas ou ben ao mestre que funcione como responsable en calquera dos centros educativos do municipio. Deberán entregarse en sobre pechado sen ningún tipo de dato persoal. Estes datos deberán ir en sobre á parte, acompañando a obra.
O primeiro premio consiste na publicación da redacción no libro da Festa da Troita e o agasallo dunha tableta electrónica. O xurado estará formado polos mestres responsables e un representante do Concello.
O concurso de Fotografía basearase en imaxes sobre a Festa da Troita, o municipio, labores tradicionais, as xentes ou aspectos relacionados con Ponte Caldelas e a sostibilidade. Non se admiten imaxes manipuladas con programas gráficos.
O tamaño mínimo das copias debe ser de 15x20 centímetros e poden ser a cor, branco e negro, brillo ou mate. Os premios serán de 300 euros para o primeiro, 200 para o segundo e 100 euros para o terceiro.
O Concello organizará unha exposición no Centro Cultural entre os días 6 e 15 de abril con todos os carteis e fotografías presentados. Na mostra estarán destacados e identificados os tres carteis e as nove fotografías previamente preseleccionadas polo xurado municipal.
Os veciños empadroados en Ponte Caldelas terán opción de votar para designar os traballos gañadores nas dúas modalidades. En caso de que non haxa máis de 25 votos populares será o xurado o que tome a decisión final.
As bases para estes tres concursos foron aprobadas pola Xunta de Goberno local e xa están colgadas en www.pontecaldelas.org.
Relacionadas:
-
A Festa da Troita xa ten cartel para a súa 51 edición
Por Redacción |
-
Comeza a exposición dos traballos finalistas do concurso de carteis e fotografías da Festa da Troita
Por Redacción |
-
A xira promocional da Festa da Troita polas parroquias contará con 25 paradas
Por Redacción |
-
A troita volverá ir de xira por todas as parroquias de Ponte Caldelas
Por Redacción |
-
Ponte Caldelas "está de moda"
Por Redacción |
-
Satisfactorio balance da L Festa da Troita
Por Redacción |
-
"O peixe máis bonito do mundo" xa ten escultura en Ponte Caldelas
Por Redacción |