Cidadáns pregunta pola situación da policía portuaria
Por Redacción
A concelleira de Cidadáns en Pontevedra, María Rey, reuniuse co presidente da Autoridade Portuaria de Marín e Ría de Pontevedra, José Benito Suárez Costa, e o director do Porto, Miguel Ángel Navarro, co propósito de coñecer a situación da policía portuaria e trasladar as inquietudes destes traballadores.
María Rey interesouse polos medios cos que contan os axentes, xa que, como sinalou, "aínda non temos coñecemento do que sucede a pesar de que hai unha moción de Cidadáns aprobada no pleno de xullo de 2016 na que se instaba ao alcalde para preguntar acerca desta cuestión".
Concretamente, a agrupación municipal xa presentara no pleno do mes de xullo de 2016 unha moción para que o alcalde, como membro do Consello de Administración da Autoridade Portuaria de Marín e Ría de Pontevedra, instase a este órgano para realizar un estudo sobre a adecuación, en canto a medios materiais, humanos e de formación, da Policía que se encarga da seguridade desta entidade.
"Ante o inmobilismo do grupo de goberno, quixemos informarnos do que está a suceder", sinalou María Rey.
Tanto o presidente como o director da Autoridade Porturaria preocupáronse por coñecer as reclamacións dos traballadores, mostrándose abertos a estudar a situación.