O campus de Pontevedra ofrece sete cursos abertos a toda a cidadanía
Por Redacción
Un achegamento á educación non formal, a abordaxe da teoría das intelixencias múltiples como ferramenta didáctica e un achegamento á fotografía desde a perspectiva de xénero, un obradoiro de control de son en radio, así como as novas edicións dos talleres de oratoria, locución audiovisual e interpretación de instrumentos populares completan a oferta formativa do campus de Pontevedra para este cuadrimestre.
Desde finais de decembro permanece aberto o prazo de inscrición nos sete talleres, abertos a toda a cidadanía, que se desenvolverán no campus entre febreiro e abril.
"Aínda que sempre se pensan para o alumnado, como unha formación complementaria relacionada con algunha das áreas dos diferentes graos, trátase duns obradoiros abertos a todo o mundo", salienta o responsable da Área de Extensión Cultural, Manuel Morquecho, destes talleres de 30 horas cun prezo de matrícula de 26 euros para os membros da comunidade universitaria e de 40 para o resto das persoas interesadas.
De feito, anteriores edicións reunía entre os seus alumnos, engade, "a rapaces de 18 anos e xente xubilada, o que, á marxe do que se vaia aprender no curso, é xa de por si unha riqueza".