En Marea esixe á Xunta construír en 2017 o colexio do Revel
Por Redacción
A Xunta ten, segundo En Marea, unha "materia pendente" nas infraestruturas educativas da comarca do Salnés: o novo colexio de Vilalonga, que se debe construír na zona do Revel. Por iso, este partido solicita ao goberno galego que acelere o proxecto.
O CEIP que está a dar o servizo actualmente, O Cruceiro, presenta "graves deficiencias e falta de mantemento" pois ano tras ano, segundo En Marea, apostouse pola construción do novo centro e deixouse de investir no actual, "que é o que a duras penas aínda segue funcionando".
Cos orzamentos de 2017 encima da mesa, lamentan desde En Marea, a Xunta "volve esquecerse" do proxecto mentres, en cambio, destina case medio millón de euros para un dique de abrigo no porto de Portonovo "que só beneficia aos veleiros e demais embarcacións de recreo do Club Náutico".
En Marea denuncia que os gobernos do PP tanto na Xunta como no Concello foron dilatando o proxecto, "sempre amparándose en trámites administrativos e outras complexidades burocráticas que pouco ou nada importan aos veciños desta parroquia".
Por iso, o partido avanza que presentará unha emenda aos orzamentos de 2017 para que se amplíe a partida destinada á construción do novo centro educativo do Revel en Vilalonga e o próximo ano sexa, finalmente, cando se constrúa o "tan ansiado e demandado" colexio.