A Policia Local detén dúas persoas por tentar roubar nun comercio da Oliva
Por Redacción
Dúas persoas foron detidas acusadas dun presunto delito de roubo en grao de tentativa nun local comercial da rúa Oliva.
Trátase de dous mozos, un deles menor de idade, localizados pola Policía Local tras recibir unha chamada telefónica alertando do suceso.
Sucedeu ao redor das 3:30 horas da madrugada do sábado, cando unha testemuña deu a alerta ao observar nun comercio da Oliva a dúas persoas que fracturaran un cristal e atopábanse no interior do establecemento.
Ao chegar ao lugar, unha patrulla da Policia Local de Pontevedra observou na porta do local unha barra metálica, e localizou a tres persoas preto da zona que facilitaron a descrición dos mozos manifestando que momentos antes atopábanse sentados no acceso do comercio con roupa escura e carapuchas. Ademais sinalaron que ao paso dun vehículo policial levantaron e marcharon do lugar.
Coa descrición facilitada, os axentes localizaron pouco despois aos sospeitosos na rúa Andrés Muruais, recoñecendo ser os autores do intento de roubo.
Os detidos son dous mozos de 18 e 17 anos de idade.