O dono dun bar de Vilagarcía, detido por vender droga no seu local
Por Redacción
Unha inspección rutineira da Garda Civil acabou en sorpresa. Os axentes, tras detectar varias infraccións administrativas, descubriron que no local pasaba algo máis. O seu dono, segundo as investigacións, vendía droga no interior do propio bar.
Segundo informou o instituto armado, no interior do establecemento os axentes interviñeron preto de 400 gramos de haxix e 17,4 gramos de cocaína, dispostos supostamente para a súa distribución e venda.
Nas distintas estancias do bar, a Garda Civil tamén incautou unha báscula de precisión, ademais de diñeiro en efectivo e unha importante cantidade de envoltorios plásticos perfectamente recortados e adaptados para o empaquetado, distribución e venda das doses.
Así, o dono do bar, situado nunha céntrica rúa de Vilagarcía de Arousa, foi detido e pasou a disposición xudicial por un delito contra a saúde pública. Tras declarar ante o xuíz, quedou en liberdade con cargos.
No transcurso da inspección, os axentes detectaron varias infraccións que derivarán en denuncias administrativas, en virtude da lei de seguridade cidadá, entre elas o feito de que cinco clientes atopábanse fumando haxix dentro do bar.
Tanto os clientes identificados, como a propia camareira do bar á que tamén se lle incautou unha pequena cantidade de haxix que gardaba dentro dun paquete de tabaco no interior do seu bolso, foron denunciados pola tenencia e consumo de estupefacientes nun establecemento público.
Ademais, o propietario tamén foi denunciado por permitir o consumo de estupefacientes no seu interior e por ter á venda varias botellas de licores que carecían de etiquetaxe e precinto fiscal, así como dúas botellas de viño branco sen etiquetaxe e rexistro sanitario.