Piden catro anos de prisión para o autor confeso dunha agresión sexual a unha muller
Por Redacción
Alfonso M.P. admitiu ante a Audiencia de Pontevedra que agrediu sexualmente a unha muller, polo que a Fiscalía pediu para el unha condena de catro anos de prisión e unha pena de cinco anos de prohibición de comunicarse coa vítima e de aproximarse a menos dun quilómetro dela, do seu domicilio e lugar de traballo.
Estes feitos ocorreron en Porriño o 6 de febreiro de 2014. O acusado saíra de noite cun amigo e estaba bébedo, como sostiveron todas as testemuñas que compareceron este martes no xuízo celebrado na Sección Segunda da Audiencia.
Inicialmente a Fiscalía solicitara unha condena de quince anos de cárcere, xa que tamén imputaba a este home un delito de detención ilegal, que posteriormente retirou xa que entende que hai absorción de delitos posto que para cometer a agresión tivo que reter á vítima.
Na rebaixa da petición de pena o fiscal tamén tivo en conta a existencia dunha eximente incompleta de embriaguez.
Segundo o escrito de acusación da Fiscalía, o procesado atou polas mans cunhas cordas á muller, obrigouna a subir ao seu coche e levouna ao seu domicilio, onde abusou dela tras un forcexeo.
A Fiscalía tamén solicitou que o acusado abone 6.000 euros á muller en concepto de responsabilidade civil. Tanto a acusación particular como o avogado da defensa mostráronse de acordo coas peticións expostas polo fiscal.
O xuízo quedou visto para sentenza.