O accidente de Vilaboa, un "despropósito máis" para os Bombeiros do mapa de emerxencias
Por Redacción
A Plataforma de Bombeiros Públicos de Galicia volve alertar do "caos" que supón o actual mapa de emerxencias galego, un protocolo que "atenta" contra a integridade dos cidadáns. O último exemplo, aseguran, foi o accidente que ocorreu en Figueirido (Vilaboa), onde dúas persoas resultaron feridas de carácter grave tras un choque frontal entre dous turismos.
O sinistro produciuse contra as oito da tarde no tramo de tres carrís da estrada de Pontevedra a Vigo, a nacional N-550, fronte á entrada ao hotel El Edén, no termo municipal de Vilaboa. Alí, un Mercedes e un Ford Focus, bateron de forma frontal. O forte impacto reduciu os coches a un amasillo de ferros do que foi necesario excarcerar a unha das atrapadas.
Segundo a plataforma, o 112 Galicia alerta os Bombeiros do Morrazo que son os que atenden o municipio de Vilaboa. Tamén comunica o accidente aos de Pontevedra, pero lles di que a súa actuación non é necesaria. Todo iso a pesar de que o parque de Bueu está a 31 quilómetros do accidente e o de Pontevedra a apenas dez e ademais por autoestrada.
A situación complicouse polas obras de ampliación da vía rápida do Morrazo e debido ao atasco de tráfico, os efectivos de Bueu contactaron de novo co 112 para comunicar que a súa chegada ao punto do accidente vaise a demorar bastante polo que, quince minutos despois de dicirlles que non eran necesarios, acaban mobilizando ao parque de Pontevedra.
Os Bombeiros de Pontevedra chegaron en apenas dez minutos e comezaron a traballar, segundo o relato da plataforma. Para cando xa teñen o vehículo excarcerado e o ferido na súa padiola, disposto a ser trasladado cara a ambulancia, chegaron os efectivos de Bueu polo que xa non foi necesaria a súa actuación.
Así, a atención aos feridos graves de este sinistro demorouse máis de quince minutos no normal, polo que reiteran que o actual sistema é un "despropósito" e non existe un razoamento "lóxico" para mantelo tal e como está. Por iso se preguntan "cantos casos máis como este terán que pasar" para que se modifique o actual mapa de emerxencias.